Theodor Birgisson

Verðbréfasalinn

Maður nokkur hitti vin sinn sem er verðbréfasali. Vitandi að afar ótryggu ástandi og almennri vanlíðan bankamanna spurði hann verðbréfasalann: "Hvernig sefur þú á næturnar eftir þessar hamfarir". Verðbréfasalinn svaraði að bragði "Ég sef eins og ungabarn". Þetta kom vinunum sannarlega á óvart svo að hann bað um frekari útskýringar á því. Verðbréfasalinn svaraði og sagði: "Já ég sef eins og ungabarn. Ég vakna grátandi á klukkutíma fresti og er þá búinn að pissa á mig..."

Hresstu þig í Drottni!

Íslenska þjóðin stendur frammi fyrir miklum vanda og sumir eru svo gott sem bugaðir af ástandinu. Á slíkum tímum er mikilvægt að rifja upp og minna sig á hver Guð er og hvað hann getur gert í óvinnanlegum kringumstæðum.

Ein af hetjum Biblíunnar er Davíð konungur Ísraelsmanna. Hann var valinn sem konungur af Samúel spámanni Guðs en það liðu mörg ár áður en hann settist í hásæti ríkisins. Á leiðinni þangað lenti hann í ýmsum þrengingum og sumar þeirra voru algerlega yfirþyrmandi. Við getum hins vegar lært mjög mikið af Davíð og viðbrögðum hans.

Ein af mínum uppáhaldssögum fjallar um kringumstæður sem hefðu brotið nánast hvern sem er. Davíð fór í hernað með sínum fylgismönnum og þegar þeir koma heim aftur voru óvinir þeirra búnir að brenna öll húsin þeirra og ræna öllum konum og börnum Davíðs og liðsmanna hans. Eðlilega voru þeir allir algerlega bugaðir. Davíð hins vegar grípur til þess ráðs að "hressa sig í Drottni". Síðan fer hann fram fyrir Drottinn og spyr hann ráða, og Guð segir honum að fara á móti óvinum sínum og endurheimta allt sem stolið var frá honum. Davíð tekur ráðum Drottins og fer og nær í það sem stolið var frá þeim og síðan halda menn heim glaðir í bragði.

Mín einlæga hvattning til okkar allra er að HRESSA SIG Í DROTTNI og leyfa Guði að tala til okkar og framkvæma síðan það sem Drottinn segir okkur að gera.

Njótið lífsins vinir og hressum okkur í Drottni!!!

Launs efnahagsvandans

Ég heyrði frábæra útskýringu á lausn efnahagsvandann á Íslandi. það eru tvær meiginlausnir á vandanum:

a) Icelandair
b) Iceland Express

:-)

Fallegur dagur!

Mikið er þetta fallegur dagur. Jörðin snævi þakin og allt svo hreint og bjart. 

Það er ekki erfitt að taka þann pólinn í hæðina að Guð sé að segja við okkur að þrátt fyrir allt öngþveiti í fjármálageiranum þá geti hann komið með kærleika sinn og breytt yfir klúðrið okkar og gert allt nýtt og fallegt aftur. Og það bæði getur hann og gerir! Það er þörf á því á þessum tímum að við leyfum Guði að tala inn í kringumstæður okkar og leiða okkar inní þær aðgerðir sem við þurfum að framkvæma. Þjóðstjórn eða ekki - ráðamenn ættu nú sem aldrei fyrr að biðja þann sem allt veit að ráðleggja sér. Erfiðleikar hafa aldrei komið Guði í klandur, ALDREI!

Ég ætla að njóta þess að vera til í dag. Ég ætla að njóta þess að elska fjölskylduna mína og vini mína og njóta þess að njóta kærleika þeirra. Ég ætla að njóta þess að vera á lífi og hafa heilsu til að njóta lífsins. Ég ætla að njóta þess að fá mér gott kaffi og súkkulaði mola með því. Ég ætla að njóta þess að hlakka til kvöldsins vitandi að ég fæ að sofna án þess að þurfa að óttast stríðsátök og hörmungar. Ég ætla að njóta þess í dag að vera elskaður af Guði og fyrir þau forréttindi að fá að vera Íslendingur. Og þar sem ég veit að pabbi minn les þessar línur á eftir þá ætla ég að njóta þess að koma við í kaffi hjá pabba og mömmu áður en ég keyri heim á sveitasetrið mitt á eftir.

Vinir mínir - gerið eins og ég og njótið þess að vera til. Lífið er Guðsgjöf!!!

Þjóðnýting Glitnis?

Ég hef eins og aðrir landsmenn fylgst með fréttum af fjármálageiranum með miklum áhuga undanfarið. Minn áhugi er tvíþættur, ég er bæði viðskiptavinur og starfsmaður fjármálafyrirtækis.

Eitt orð er notað aftur og aftur í fréttum, ekki síst í dag í tengslum við yfirtöku ríkisins á Glitni. Það er ítrekað talað um ríkisvæðingu bankans og "þjóðnýtingu" hans. Það er mikill miskilningur hjá fréttamönnum að Glitnir  sé orðin ríkisbanki. Glitnir er almennt hlutafélag sem ríkið á stærsta hlutann í. Það er allt annað en ríkisbanki. Annað orð sem ég skil engan vegin er orðið "Þjóðnýting" bankans. Ég sé ekki hvernig þjóðin er að nýta bankann! Einu not þjóðarinnar af honum er að fá að borga brúsann fyrir stjórnendur hans. Það er reyndar ekki heldur þannig að þjóðin sé að tapa á þessu inngripi. Við eigum þá öll orðið hlut í banka sem mun alveg klárlega ná sér aftur á strik og þá fáum við ávinningin af þessari ákvörðun yfirvalda. En þjóðnýting getur varla talist rétt hugtak yfir þessa aðgerð.

En hvað veit ég svo sem um þessi mál. Ekki er ég fjárfestir, heldur venjulegur einstklingur sem fer í Jóhannesarbúð með hýruna mína og kaupi mjólk og hveiti fyrir fólkið mitt.

Njótið annars lífsins vinir mínir - líka þið sem eigið hlutafé í Glitni!

Ný vinnuvika

Mánudagar eru yndislegir! Dagurinn markar upphaf nýrrar vinnuviku og á tímum sem þessum eru forrréttindi að hafa vinnu og geta framfleitt sér og sínum. Það er rólegt hér á sveitasetrinu þessa stundina. Kata er farin til vinnu og Jósúa og Elín Rut í skólann. Sjálfur ætla ég að bíða eftir Theu og nafna mínum heim frá Kanada áður en ég keyri í vinnu. Þau lentu í Keflavík skömmu fyrir sjö og eru á leiðinni heim. Mikið hlakka ég til að hitta þau bæði.

Vikan er hlaðin eins og alltaf hjá okkur Kötu minni. Aldrei logn í kringum okkur! Það er talsverð áskorun að sameina fullt starf fyrir KB ráðgjöf og sívaxandi umsvif Mozaik. Staðan er þannig núna að ég er að vinna álíka margar vinnustundir fyrir kirkjuna og bankann. Kirkjan hefur þó ekki enn þá bolmagn til að hafa presta á launum og þá er mikilvægt að hafa góða vinnu annarstaðar til að skaffa brauð á borðið og þak yfir höfuðið.

Njótið dagsins vinir - hann er Guðs gjöf til okkar!

Tveir fyrir einn!

Bloggleysi mitt hefur náð alveg nýjum hæðum þegar pabbi minn er farinn að kvarta yfir skrifleysi. Og þó svo að bæði Elfar vinur minn og Erla systir kvarti - og ég met þau bæði mjög mikils - þá þori ég ekki annað en bregðast við áskorun pabba um að skrifa meira.

Ég fór um síðustu helgi í veiðitúr vestur í dali með góðum vinum og átti mjög góða helgi. Ég mokveiddi. Ég veiddi jarðepli upp úr pottinum á eldavélinni, ég veiddi nammi úr bónusbokanum og ég veiddi sögur uppúr Kidda bróðir og Halldóri Lár. Þetta var stórskemmtilegt. Ég fann meðal annars spennandi verslun þarna vestra. Búðin heitir Skriðuland er svona "tveir fyrir einn" markaður. Þú borgar tvo hluti og færð einn!!! Þetta var svo dýr verslun að þegar ég þurfti að fara aftur daginn eftir fyrstu heimsókn mína þangað bað ég ég Kidda bróðir að koma með :-)

Í dag höfum við fjölskyldan notið þess að vera saman, það er að segja þau okkar sem eru á Íslandi. Birgir Steinn hefur vetrarsetu í Kaliforníu og líður þar mjög vel og Thea og nafni minn eru í Toronto á móti í TACF kirkjunni hjá John og Carol vinum okkar. Hún fór ásamt 70 manna hópi sem Guðbjartur og Sigga Helga eru í fylkingarbrjósti fyrir. Við heyrðum í Birgi Steini áðan og erum núna að bíða eftir því að Thea okkar hringi heim, en það verður á næstu mínútum.

Jósúa okkar fyllir sitt 15. ár í dag og afmælisdagar eru alltaf sérstakir hjá okkur. Við fórum inní borgina í morgun og höfum verið þar í allan dag. Fórum meðal annars í kaffi til pabba og mömmu og hittum þar fyrir Kidda og drengina hans, en Ásta var á Jesú konu móti í Fíladelfíu. Það er ómetanlegt ríkidæmi að eiga góða fjölskyldu og njóta samveru við hana. Síðan fórum við út að borða með krakkana okkar og síðan í bíó. Mjög gaman. Afmælið hans Jósúa míns verður síðan þegar Thea er komin heim aftur. Birgir Steinn hringdi í bróður sinn til að óska honum til hamingju með daginn. Við Kata mín erum sannarlega blessuð með börnin okkar og yndislegt að finna að þau eru öll svo miklir vinir. Jósúa hefur verið okkur endalaus uppspretta gleði og ánægju frá því að við fengum hann í hendurnar fyrir réttum 15 árum. Jósúa minn - innilega til hamingju með daginn. Þú ert einstakur og frábær drengur og ég er MJÖG stolltur af þér!!!

Njótið lífsins vinir mínir - það ætla ég alla vega að gera! 

Kærkominn frídagur

Það er  engum ofsögum sagt að það hafi verið frekar þéttskipuð dagskrá hjá mér frá því að ég kom heim frá USA um daginn.  Þar blandast saman  annríki í  minni launuðu vinnu og krefjandi verkefni í kirkjunni okkar. Þar er vetrarstarfið að fara í gang á morgun með samkomu kl. 14:00, en það er fyrsta sunnudagssamkoman okkar. Í framtíðinni verðum við því bæði með samkomur á miðvikudögum kl. 20:00 og á sunnudögum kl. 14:00. Barnastarfið verður á sunnudögum og það hefst á morgun. Það gerist ekki neitt af sjálfu sér og því hefur það tekið talsverðan tíma að koma þessu öllu heim og saman. Mozaik nýtur þess að þar er gríðarlega margt hæfileikafólk sem hefur unnið þrekvirki á síðustu dögum við undirbúining vetrarstarfsins.

Í dag var sem sagt fyrsti alvöru frídagurinn síðan við komum heim. Við nutum þess að sofa út og hvíla okkur. síðan voru við svo heppinn að Kiddi og Ásta komu í kaffi til okkar og Erla og Erling litu líka við. Það eru svo mikil forréttindi að eiga systkini sem eru vinir mans og það var mjög  gaman að sitja og spjalla við þessa góðu vini.

Ég ætla það sem eftir lifir kvölds að njóta þess að sitja í faðmi fjölskyldunnar og njóta augnabliksins. Ekki ólíklegt að ég reyni líka að hjálpa fólkinu mínu að glíma við þessar kaloríur sem er hér á borðum. Það væri ekki sanngjarnt af mér að láta þau sitja ein uppi með alla þessa vinnu. Enda er ég ekki frá því að ég hafi grenst í morgun.....

Njótið lífsins vinir - það er Guðs gjöf til okkar!

Mér tókst...

...að vakna á réttum tíma og drífa mig í vinnuna í dag. Ég er svo lánsamur að fá að vinna vinnu sem mér þykir skemmtileg þó að ég vildi frekar vera í fullu starfi sem prestur. Verkefnin voru mörg og krefjandi enda tekur alltaf smá tíma að koma "vélinni í gang" eftir frí. En allir tóku mér vel og það var gaman að hitta vinnufélagana aftur enda er ég umvafinn frábærum vinnufélögum.

Barnastarfið  í kirkjunni okkar er að byrja á næstu dögum og við erum einnig að byrja samkomur á sunnudögum og verður sú fyrsta  þann 24. ágúst, en allar nánari upplýsingar um það eru á síðunni okkar www.mozaik.is

Kirkjan hefur verið í góðum og stöðugum vexti og það hefur verið mjög gaman að vinna með þeim frábæru einstaklingum sem þar taka þátt. Við munum halda áfram með miðvikudagssamkomurnar þó að sunnudagarnir bætast við. Á föstudaginn verður við með namskeið fyrir þá sem ætla að vinna með okkur í barnastarfi kirkjunnar og þar ætlum við að miðla því sem við lærðum í USA um daginn. Þó að námskeiðið sé ætlað fyrir barnastarfsfólk er það í raun mjög gott fyrir alla foreldra og afa og ömmur. Þeir sem vilja kynna sér málið betur er velkomið að senda mér póst á theodor@mozaik.is

Njótið lífsins vinir - það er Guðs gjöf til okkar.

Vinnan kallar...

...ég er bara ekki að hlusta á hana! Nei ég segi bara svona.

Ég fór snemma að sofa í gær, það er að segja snemma í morgun. Birgir Steinn sonur okkar fyllti árið í gær og það komu nokkrir vinir í kaffi í gærkvöldi. Partýið endaði á mikilli úthellingu Heilags Anda og við vorum langt fram á nótt að biðja, lofa Guð og tala vilja Guðs inn í líf hvers annars. Þetta var algerlega magnað! Birgir Steinn sagði að hann hefði aldrei átt yndislegra afmælispartý. Reyndar var þetta ekki hin eiginlega afmælisveisla - bara svona forréttur!

Ég stillti vekjarann samviskusamlega og tók svo að mér að slökkva á honum við fyrsta hanagal í morgun. Þegar ég loksins raknaði úr rotinu var klukkan orðin 12:23 og mér var verulega brugðið. Ég held að ég hafi síðast sofið yfir mig á seinnihluta síðustu aldar. Ég tók því yfirvegaða ákvörðun og lengdi sumarfríiið mitt um einn dag og var heima allan daginn með fólkinu mínu. Það var yndislegt. Ég vinn þannig að vinnu að ég gat líka gripið í nokkur verkefni inná milli. Á morgun mun vinnan kalla aftur og þá hef ég ákveðið að hlýða kallinu.

Njótið lífsins vinir og alls þess sem Guð á fyrir okkur!