Theodor Birgisson

Californía

Við Kata mín erum þessa dagana stödd í Redding í Californíu. Það verður að segjast að þrátt fyrir þau forréttindi að eiga nokkra daga í fríi fjarri öllum daglegum skyldum þá hafi stór hluti af hjarta okkar orðið eftir heima hjá krökkunum okkar og litla Theodóri Ísaki, afastráknum mínum.

Við byrjum á að eiga hér vestra einnrar viku frí en förum svo á vegum Mozaik á mjög spennandi námskeið fyrir leiðtoga í barnastarfi. ég segi ykkur meira frá því þegar nær dregur.

Við flugum á föstudaginn frá Keflavík til New York og áttum síðan að fara beint þaðan til San Fransisco þar sem við ætluðum að gista eina nótt. Þegar við komum til NY var hins vegar búið að fella niður flugið okkar til San Fran þannig að við þurftum að gista í NY í staðinn. Fyrir mistök fór hins vegar ALLUR farangurinn okkar beint til San Fran með flugi sem hafði seinkað fyrr um daginn og fór því um sama leyti og okkar flug átti upprunarlega að fara. Við vorum því ekki með nein föt til skiptanna eða snyrtidót með okkur í NY og það verður að segjast að það var upplifun sem mig langar ekki að endurtaka. Að þurfa að morgni að klæða sig í óhreina skyrtu og óhreinar nærbuxur er ekki spennandi!!! Við fengum far með fyrstu vél dagsins kl. 06:00 á laugardagsmorgun. Við vorum svo heppinn að það var lítil biðröð í flugtak hjá okkur þannig að við þurftum ekki að bíða nema í 45 mín á brautarendanum þar til vélin fór í loftið. Síðan var svo mikill mótvindur að vélin var rúmman klukka lengur í loftinu en gert hafði verið ráð fyrir. Við sátum því í þröngri flugvél í rúmma 8 tíma þennan daginn. Kata náði að sofa nánast alla leiðina en ég náði því miður ekki að festa blund. Þegar til San Fran var komið leigðum við okkur bíl og keyrðum síðan aðeins um San Fran. Fórum meðal annars um agalegustu brekkur sem ég hef nokkurn tíman keyrt um. Það var sannarlega skemmtileg upplifun. Síðan fórum við yfir Golden Gate brúnna á leið okkar norður til Redding. Aksturinn þangað tók rétt rúmma 4 tíma með einu matarstoppi. Kata náði sem betur fer að sofa góða part af bíltúrnum norður eftir.  Þegar við komum til Redding um kl. 16:30 að staðartíma lagði kata mín sig aðeins. Hún hefur sennilega verið þreyttari en hún gerði sér grein fyrir því að hún vaknaði ekki fyrr en kl. 05:30 næsta morgun!

Sunnudagurinn fór síðan í samkomur í Bethel kirkjunni en við náðum 3 samkomum á einum degi sem er persónulegt met fyrir okkur ef ekki eru tekin með þau fjölmörgu mót sem við höfum sótt um ævina. Þetta voru allt frábærar samkomur sem við nutum í botn. Í dag - mánudag - höfum við síðan ekki gert neitt nema legið í sólinni, lesið, sofið og borðað og síðan talsvert af því sem við segum engum frá.

Ég segi ykkur meira frá ferðinni á morgun. Njótið lífsins vinir - það er sannarlega Guðs gjöf til okkar.

Skýjum ofar!

það er  engum orðum ofsagt að segja að við Kata mín erum búin að vera skýjum ofar af gleði og hamingju alla helgina. Theodór Ísak og Thean okkar hafa verið miðdepill allrar fjölskyldunnar í gær og í dag. Þau dafna bæði eins og blóma í eggi. Ég hef sett inn talsvert nýjum myndum á myndasíðuna mína. Smellið hér og sjáið með eigin augum fallega afastrákinn minn.

Einstök tilfinning!

Ég verð mjög sjaldan orðlaus! Í morgun átti ég hins vegar alls engin orð til að lýsa því hvernig mér leið.


Kata mín hringdi í mig kl. 07:15 og sagði "hann er fæddur, drífðu þig til okkar". Ég dreif mig af stað og tók Elín Rut mína með mér og rauk uppá sjúkrahús. Þar þurfti ég að bíða í nokkrar mínútur áður en læknirinn kom skælbrosandi fram og sagði, "Afi má núna koma og heilsa uppá dóttur sína og dótturson". Ég hraðaði mér inn ganginn með lækninum og ætlaði hreint ekki að trúa mínum eigin augum þegar ég sá þennan líka gullfallega dreng í faðminum á ömmu sinni. Thea mín tók hann svo í fangið og sagði: "Hér er mættur Theodór Ísak Theuson".

Vá !!! Ég átti engin orð þannig að ég lét tárin duga. Ég fékk svo litla nafna minn í fangið og við erum strax orðnir bestu vinir.

Ég er svo stolltur af Theu minni og litla drengnum hennar og þakklátur Guði fyrir lífið. Ég setti inn nokkrar myndir af litla prinsinum á myndasíðuna mína. Þú sérð myndirnar með því að smella 
hér.

Vinnan kallar!

Mikið var yndislegt að eiga frí í gær þó að mér finnist reyndar þetta sumarleyfi hafa verið helst til stutt! Enn einn dagur er einn dagur.

Við fórum í sund í gær eins og við gerum afar oft. Það var svo notalegt að liggja í heita pottinum og finna rigninguna falla létt á andlitið á meðan líkaminn var umvafinn heitu vatni. Sundlaugarnar á Íslandi eru hreint út sagt frábærar.

Við fengum svo gesti og fórum sjálf í heimsókn. Fyrst komu þær við tengdamamma og Beta mágkona en þær voru á leiðinni í Fljótshlíðina til Maggý mágkonu minnar og Jóhannesara svila, en þau eiga myndarlegt sumarhús í hlíðinni. Sirrý systir óðalsbóndi kom svo við í kaffi en þau Guðjón fluttu á herragarðinn sinn í núna um helgina. Við keyrðum svo inní borgina um kvöldið og tókum hús á Dagný frænku sem var með kaffiboð í tilefni þess að hún fyllir árið á morgun.

Dagurinn var sem sagt yndislegur og ég væri alveg til í að eiga frí í dag líka. En vinnan kallar og það verður að hlýða því kalli. Ekki veitir af þar sem eldsneytisverð er í hæstu hæðum. Ég vona að ég nái alla vega að þéna nóg í dag til að eiga fyrir olíunni á vagninn....

Njótið dagsins vinir - hann er Guðs gjöf til okkar!

Sumarfrí!

Mikið er  yndislegt að eiga sumarfrí. Ég byrjaði í sumarfríi í morgun og þarf ekki að mæta í vinnu aftur fyrr en  í fyrramálið! 

Kata mín er byrjuð í sumarfríi og ég ákvað því að taka mér frí í dag og njóta þess að vera heima hjá fólkinu mínu. Ég tek svo mitt eiginlega sumarfrí síðustu vikuna í júlí og fyrstu vikuna í ágúst. Þá ætlum við Kata mín að leggja land og haf undir fót og fara á mjög spennandi námskeið vestur í Kaliforníu. Við ætlum um leið að taka okkur rúmlega viku frí þar vestra og njóta þess að vera saman og hafa ekki að neinu að huga nema okkur sjálf.

Njótið lífsins vinir og munið það er Guðs gjöf til okkar.