Theodor Birgisson

Hann gerði það allt fyrir mig!

Við feðgarnir horfðum saman á The Passion of the Christ í gærkvöldi. Þetta er alveg mögnuð mynd sem sýnir á raunverulegan hátt hvaða þjáningar Jesús leið þennan merkilegasta föstudag allra tíma. Þeir sem vel til þekkja vilja reyndar meina að Mel Gibson hafi frekar en hitt látið pintingarnar sem Jesús leið líta betur út en raunin var. Hvort sem það er rétt eða ekki fannst mér meðferðina á frelsara mínum óhugnanleg. Og hugsið ykkur þetta; allan tíman hefði hann getað stöðvað þetta ferli ef hann hefði ekki elskað þig og mig jafnmikið og hann gerir. Við getum öll sagt það sama og býr í mínu hjarta í dag: HANN GERÐI ÞAÐ ALLT FYRIR MIG!

Ég er svo þakklátur Guði fyrir að hann skuli elska mig bara eins og ég er. Ég er líka svo þakklátur Guði fyrir að hann skuli elska mig nógu mikið til að láta mig ekki halda áfram að vera eins og ég er. Hann vinnur að framförum mínum á hverjum einsta degi. Þar þarf ég ekkert að gera annað en að leyfa honum að stjórna gerðum mínum og hugsunum.

Það eru enginn takmörk fyrir því hversu heitt Jesús elskar þig. Leyfðu honum að sýna þér hvers hann er máttugur.

Njóttu þessa góða dags. Hann er Guðs gjöf til þin. 

Síða sem ég mæli með

Það er mikið um að vera í trúarlífi íslendinga og ég læt mitt ekki eftir liggja þar. Mig langar því að vekja athyggli á bloggsíðu sem fjallar um ýmislegt sem tengist trúarupplifunum og trúarlegum mótum sem haldin eru oft á ári hér heima á Íslandi og erlendis. Selltu hér til að heimsækja ELDINN.

Rétttrúnaður trúlausra

Undanfarið hefur Siðmennt gert harða atlögu að kristni á Íslandi og starfi kirkjunnar. Ég hef aldrei farið með það sem leyndarmál að ég er kristinn maður, og er verulega glaður að búa í kristnu landi. Þjóðfáni okkar og þjóðssöngur minna okkur stöðulega á hlutverk kristinnar trúar á landinu. Ég geri mér líka fullkomna grein fyrir því að það eru margir á okkar góða landi sem eru ekki kristnir og þeir hafa fullan rétt á því. En mér finnst þeir ekki hafa rétt á að brjóta niður og gera lítið úr þeim sem velja að lifa eftir kristnum gildum eins og þeir gera núna í ríki mæli. Ég tilheyri Hvítasunnukirkjunni á Ísalandi sem stundum hefur verið kölluð "sértrúarsöfnuður" eða jafnvel "ofsatrúarsöfnuður". Hvorugt þessara tveggja á við um Hvítasunnukirkjuna. Siðmennt er hins vegar klárlega "ofsatrúarsamtök" þar sem þeir berjast hart á móti kristinni kirkju. Ég hef heyrt bergmál fjölmargra undanfarna daga sem eru afar ósáttir við framgöngu Siðmenntar í baráttu sinni gegn kirkju og kristni. Ég skora á alla þá sem eru ósammála kröfu Siðmenntar að láta í sér heyra - áður en það er orðið of seint. Það er allt of algengt að kristnir menn sitja aðgerðarlausir á meðan andstæðingar kristinna gilda fara sínu fram með offorsi og látum. Þegar öfgafullur fámennur hópur hefur síðan komið í gegn dramatískum breytingum þá fara menn loksins af stað í vonlítilli baráttu við að lagfæra það sem úrskeiðis hefur farið.

Jesús kenndi okkur eina og aðeins eina mæliaðferð "af ávöxtunum skuluð þér þekkja þá". Það er afar athygglisvert að skoða ávöxt þess að fjarlægja Guð úr Bandaríska menntakerfinu. Það er eitthvað sem ég vil ekki sjá á Íslandi. Hvað með þig?

Ekki sitja þegjandi á sannfæringu þinni. Komdu henni á framfæri!

Mér er spurn...

Hvernig má það vera að fjölmiðlar sniðgangi þann stóratburð sem átti sér stað á laugardaginn þegar 3.000 manns tóku þátt í þverkirkjulegri bænagöngu. Gangan var mjög vel auglýst, meðal annars voru birtar sjónvarpsauglýsingar dagana fyrir gönguna. Um kvöldið voru síðan stórir tónleikar í Laugardalshöllinni.

Gangan tókst í alla staði afar vel og er mjög merkileg í ljósi þess hve breið þátttaka trúfélaga var í göngunni. Það sem hins vegar vekur furðu mína er að ef fimm einstaklingar mótmæla því að hundasúrum sé drekt á austurlandi þá er það stórfrétt. Ef jafnmargir einstaklingar syrgja það heitt að tré séu feld og að við skulum veiða hvali þá er það orðið heimsfrétt. En það kemst ekki á forsíður blaða eða í fyrirsagnir sjónvarpsstöðva þegar 3.000 manns genga saman í Reykjavík til að standa í gegn andlegu myrkri í landinu okkar. Undarleg forgangsröðun.

Ég er ánægður með þá einstaklinga sem stóðu að göngunni og kann þeim mínar bestu þakkir! Og þó að það sé heldur minni lestur á minni síðu en á mbl.is og visir.is þá kemst fréttin um gönguna á mína forsíðu.

Njótið lífsins vinir - það er Guðs gjöf!

Jesús var ekki myrtur

Ný auglýsing frá Símanum hefur aldeilis fengið mikla athyggli. Jón Gnarr hefur án þess að hafa nokkur tíma ætlað sér það náð að ergja starfsmenn Biskupsstofu og ég verð að segja að viðbrögð þeirra vekja undrun mína. Það er samt alltaf þannig að menn verða að fá að hafa sína skoðun hvort sem þeir vinna hjá Þjóðkirkjunni eða Vegagerðinni eða hvar annarsstaðar sem er.

Halldór Reynisson, fræðslusjtóri Biskupsstofu, fór hins vegar með rangt mál á báðum stóru sjónvarpsstöðvunum í gær. Ég þekki Halldór ekki neitt en hann hefur alltaf virkað mjög vel á mig og ég haft á honum mætur. En þegar jafn áberandi maður innan Þjóðkirkjunnar og Halldór er, heldur fram þeirri fullyrðingu að dauði Jesú hafi verið réttarmorð þá get ég ekki hjá því komist að leiðrétta þann misskilning.

Morð - hvort sem um er að ræða réttarmorð eða annarskonar morð - hefur það megin innihald að einstaklingur er tekin af lifi án þess að óska þess sjálfur. Líf einstaklings er stytt - líf hans er tekið. Morð eru að mínu mati óafsakanleg og óréttlætanleg. Jesús var hins vegar alls ekki myrtur. Þvert í móti - hann GAF líf sitt fyrir þig og mig. Það gat engin maður tekið líf Jesú, ef Jesú hefði ekki GEFIÐ líf sitt hefði hann aldrei dáið. Fórnardauði Jesú á Golgata var því alls ekki réttarmorð eins og Halldór Reynisson heldur fram.

Það besta við dauða Jesú var samt það að hann var ekki dáinn lengi. Á þriðja degi reis hann upp og gaf mér og þér fullan sigur á öllu veldi hins illa. Og hann lifir enn og bíður þess að fá að blessa þig þegar þú gefur honum tækifæri til þess.

Leyfðu sjálfum þér að njóta blessunar Jesú í dag.

Trú og meðferð - taka 2

Það hafa margir talað við mig um greinina í Morgunblaðinu sem ég vitnaði í í síðustu færslu. Höfundar greinarinnar hafa nú birt hana í heild sinni á netinu. Þú getur lesið hana með því að smella HÉR.

Ég vek líka athyggli á mjög góðri ræðu sr. Einars Eyjólfssonar í Fríkirkjunni í Hafnarfirði. Ræðuna í heild má lesa HÉR.

Njótið vel!

Trú og meðferð

Ég las frábæra grein í Morgunblaðinu í morgun. Svo góða og ég mæli með því að allir sem hafa fylgst með umræðum í þjóðfélaginu um kristnar áherslur í meðferðarstarfi lesi þessa grein. Greinina skrifa þeir Pétur Pétursson, prófessor í praktískri Guðfræði við HÍ og Bjarni Randver Þorsteinsson, doktorsnemi í trúarbragðafærði við sama skóla. Ég læt hér fylgja hluta greinarinnar:

Þórarinn Tyrfingsson yfirlæknir á Vogi og stjórnandi SÁÁ á mikinn heiður skilinn fyrir störf sín að heilbrigðismálum fyrir fórnarlömb áfengissýki og fíkniefna og má kalla hann spámann þjóðarinnar á því sviði. Í málflutningi sínum hefur hann hins vegar misnotað trúarhugtakið. Það er alvarlegt mál að hann sem yfirlýstur fulltrúi fagfólks í landinu skuli ítrekað viðhafa gífuryrði á borð við öfga- og ofsatrúarhópa um lögleg og fjölmenn trúfélög á borð við Hvítasunnukirkjuna. Slíkur málflutningur grefur ekki aðeins undan trúverðugleika hans sem fagaðila sem sé fær um að annast fólk úr röðum a.m.k. hvítasunnumanna heldur getur hann hæglega fælt ýmsa sem á þurfa að halda frá því að leita til þeirra stofnana sem hann er í forsvari fyrir, auk þess sem orð hans geta stuðlað að tilhæfulausri tortryggni og andúð og jafnvel einelti í garð hlutaðeigandi.

Sú starfsemi sem hvítasunnumenn hafa rekið í Hlaðgerðarkoti í nokkra áratugi er til fyrirmyndar og þeir sem vilja dæma hana úr leik á þeim forsendum að þar ráði ofsatrú ríkjum eru bæði komnir út fyrir mörk fagmennsku og velsæmis í opinberri umræðu.

Ég hvet lesendur mína til að lesa þessa grein. Þeir sem ekki eru áksrifendur af Morgunblaðinu geta sent mér t-póst og ég skal senda afrit af greininni.

Megi Guð gefa ykkur öllum góðan dag! 

Vegir Guðs...

Ég heyrði þetta spakmæli um daginn og langar að deila því með ykkur. Það er á ensku, og hljómar betur þannig en á Íslensku:

If God brings you to it - He will bring you through it !

Páfinn og himnaríki

Það hefur alltaf verið mikilvægt að trúarleiðtogar eigi greiðan aðgang að Guði á himnum. Aldrei hefur það nú samt verið mikilvægara en einmitt núna að páfinn í Róm nái fundi Himna Herrans þar sem sá fyrrnefndi hyggst breyta aðgangsreglum að himnaríki með því að afnema hreinsunareldin sem samkvæmt kenningu kaþólsku kirkjunnar brennur á milli himins og jarðar. Þá er eins gott að páfinn sé búinn að láta Guð vita þannig að lykla Pétur hleypi þeim réttu inn og fari eftir nýju reglunum.

Auðvitað mun páfa hins vegar ekki takast að afnema hreinsunareldinn, því að samkvæmt Biblíunni er hann sá eldur ekki til. Samkvæmt heilagri ritningu hafa allir menn milliliðalaust aðgengi að Guði, syni hans Jesú Kristi og himnaríki. Jesús gekk á Golgata í gegnum þá eldskírn og hreinsun sem dugir fyrir alla menn. Það eina sem við þurfum að gera er að segja JÁ TAKK við frelsisverki Jesús og þar með eigum við örugga himnavist. 

Það er sannarlega fagnaðarefni að kaþólska kirkjan hyggist breyta kenningum sínum í samræmi við Biblíuna. Að sama skapi er það hryggilegt þegar menn reyna að stýra aðgengi fólks að Guði og lausnarverki hans. Það er engum manni ætlað að setjast í það hásæti.

Njótið dagsins kæri vinir.

Á páskum

Á páskum ég finn mig svo knúinn af ást
til frelsarans Jesú sem aldrei mér brást
Hann alltaf mér tekur rétt eins og ég er
Og umhyggju endalaust fyrir mér ber

Hann dæmir mig ekki þó sekur ég sé
Því syndirnar mínar hann negldi á tré
Hann lausn sína bauð mér að lifa sér
Það sama í dag hann bíður jafnt þér

Mig skortir svo orð til lýsa hans ást
Ég aldrei af sektarkend aftur skal þjást
Nei - páskanna vegna nú gleðjast ég má
Og frið frá þér daglega Jesús minn fá

Ég þakka þér Drottinn að allt vegna mín
Þú ákvaðst að ganga í dauða og pín
Náð Guðs er ný hvern dag upp frá því
Ég vel því að dvelja þeim auðævum í
                                       TB 16. apríl 2006